Апошнім часам назіраецца тэндэнцыя накіравання ў адрас Аляксандра Лукашэнкі хадайніцтваў аб памілаванні сваякамі асуджаных, паведамілі ў Камісіі па пытаннях памілавання і вызвалення ад крымінальнай адказнасці, піша Нацыянальны прававы інтэрнэт-партал.
Там адзначылі, што такія хадайніцтвы не будуць разглядацца, бо выразна рэгламентаванае права на іх падачу толькі асабіста асуджанымі.
«У той жа час дзейнае заканадаўства не абмяжоўвае магчымасці прадстаўлення асуджанымі дакументаў і звестак, якія могуць мець значэнне для разгляду пытання аб памілаванні. Таму, пры жаданні, да асабістых хадайніцтваў могуць далучацца хадайніцтвы сваякоў або іншых асоб, роўна як і іх асабістыя паручыцельствы», — адзначылі ў Камісіі.
Там таксама параілі асуджаным накіроўваць свае хадайніцтвы аб памілаванні на імя Аляксандра Лукашэнкі «непасрэдна праз адміністрацыю папраўчай установы альбо іншага органа, які выконвае пакаранне ці іншыя меры крымінальнай адказнасці».
Нагадаем, 6 верасня Аляксандр Лукашэнка правёў нараду, на якой абмяркоўвалася амністыя для асуджаных па «палітычных» справах, якую збіраліся прымеркаваць да Дня народнага адзінства. Тады ён прызнаў, што сярод асуджаных па пратэсных справах ёсць самыя розныя людзі, у тым ліку тыя, хто здзейсніў нязначныя з пункту гледжання беларускіх уладаў «злачынствы». Пасля апублікаванага законапраекта аб амністыі стала ясна, што паводле «палітычных» артыкулаў выйдуць адзінкі, але ў іх ёсць права звярнуцца з хадайніцтвам аб памілаванні на імя Лукашэнкі.
