Намесніка дырэктара прыватнай рэкламнай тэлекампаніі ў Гомелі «ФілТБ» знайшлі мёртвым, паведаміў пошукава-ратавальны атрад «Сімуран».
Раней паведамлялася, што ўначы 1 красавіка мужчына выйшаў з дому невядома куды і не вярнуўся.
Як пісаў «Флагшток», у канцы сакавіка вядомага гомельскага бізнесоўца, заснавальніка і дырэктара прыватнай рэкламнай тэлекампаніі «ФілТБ» Віталя Філінскага асудзілі на 15 сутак за «распаўсюд экстрэмісцкіх матэрыялаў». Адбыўшы пакаранне, ён не выйшаў на волю і атрымаў яшчэ 15 сутак. Высветлілася, што яго намеснік знік без вестак.
«ФілТБ» — гэта адзінае ў Гомельскай вобласці рэкламнае агенцтва поўнага цыклу, якое займаецца распрацоўкай рэкламнай ідэі, яе ўвасабленнем і размяшчэннем атрыманага рэкламнага прадукту на ТБ-каналах. Кампанія паспяхова працавала з 1996 года, выконвала ў тым ліку дзяржзаказы. Напрыклад, здымала фільм для Савета Рэспублікі Нацыянальнага сходу. Аднак у апошнія гады ў прадпрыемства пачаліся праблемы — нягледзячы на гэта, яно працягвала працу, хоць і ва ўрэзаным выглядзе.