Тэрапеўтка прыёмнага аддзялення Гродзенскай універсітэцкай клінікі Дзіяна Маёрава выратавала жыццё чалавеку на борце самалёта. Пра гэта паведамілі ў клініцы. Дзяўчына адзначыла, што «прынцыпы працы ўсюды аднолькавыя: непасрэдных дзеянняў на паўгадзіны, а запаўнення дакументаў — на дзве».
«Падчас палёту ў адну з курортных краін пасажыру рэйса стала кепска. На шчасце для яго, тым самым рэйсам ляцела Дзіяна Уладзіміраўна Маёрава, якая неадкладна аказала неабходную медыцынскую дапамогу і заставалася для падтрымкі яго стану побач да канца палёту», — расказалі ў клініцы.
Мяркуючы з паста Маёравай у Instagram, гаворка ідзе пра рэйс у егіпецкі Шарм-эш-Шэйх. А ў пасажыра ў анамнезе былі прыступы артэрыяльнай гіпатэнзіі, то-бок перыядычнае зніжэнне ціску больш чым на 20% ад звычайных значэнняў.
Паводле тэрапеўткі, яе адпачынак пачаўся з аказання рэанімацыйнай дапамогі на борце самалёта.
«Зразумела што прынцыпы працы ўсюды аднолькавыя: непасрэдных дзеянняў на паўгадзіны, а запаўнення дакументаў — на дзве. Таксама пасля звароту да мяне сцюардэсы, маўляў, калі я скажу, што саджаем самалёт, яны яго пасадзяць, бо жыццё чалавека даражэйшае, я чарговым разам прыйшла да таго, што як я ні спрабую ўнікнуць залішняй адказнасці, яна мяне сама знаходзіць.
А ў цэлым проза жыцця такая: спачатку ледзь не пахавалі пасажыра, а праз гадзіну ўжо віншавалі сцюардэсу з днём нараджэння.
Як вынік палёту, салодкія прысмакі ад экіпажа, з’яўленне пары новых сівых валасоў і пачуццё нечуванага гонару ў мамы», — напісала яна 27 сакавіка.